ரூ.5.86 லட்சம் விலையில் புதிய ஹார்லி டேவிட்ஸன் ஸ்ட்ரீட் ரோட் 750

ஹார்லி டேவிட்ஸன் நிறுவனம் ஆரம்ப நிலை மாடலான ஸ்ட்ரீட் ரோட் 750 மாடலை ரூ.5.86 லட்சம் டெல்லி ஷோரூம் விலையில் வெளியிட்டுள்ளது. இந்த மாடல்  ஸ்ட்ரீட் 750 மாடலின் அடிப்படையில் XR டிர்ட் சீரீஸ் மாடலின் வடிவமைப்பை பயன்படுத்தி உருவாக்கப்பட்டுள்ளது.



பியூயல் டேங்க், சைடு பேனல் மற்றும் இன்ஸ்ட்ருமென்ட் கிளஸ்டர் என ஏராளமான பாகங்கள் ஸ்ட்ரீட் 750 மாடலிலிருந்து பயன்படுத்தப்பட்டுள்ளது. ஸ்ட்ரீட் 750 மாடலுடன் ஒப்பிடும் பொது இந்த மாடலின் வீல் பேஸ் குறைக்கப்பட்டுள்ளது. அதே சமயம் தரை இடைவெளியும்(205 மிமீ), இருக்கை உயரமும்(765 மிமீ) அதிகரிக்கப்பட்டுள்ளது.



இந்த மாடலிலும்  ஸ்ட்ரீட் 750 மாடலில் உள்ள அதே 750 cc V-ட்வின் என்ஜின் தான் பொருத்தப்பட்டுள்ளது. எனினும் இந்த மாடல் 18 சதவீதம் அதிக திறனை வெளிப்படுத்தும். இந்த மாடல் அதிகபட்சமாக 62Nm @4,000rpm இழுவைத்திறனை வழங்கும். இந்த மாடலில் ஆறு ஸ்பீட் மேனுவல் கியர் பாக்ஸ் பொருத்தப்பட்டுள்ளது. இந்த மாடலில் ABS நிரந்தர ஆப்ஷனாக கிடைக்கும். மேலும் இந்த மாடல் விவிட் கருப்பு, சார்கோல் டெனிம் மற்றும் ஆலிவ் கோல்ட் என மூன்று வண்ணங்களில் கிடைக்கும்.

ஹீரோ இம்பல்ஸ் பைக்கின் விற்பனை நிறுத்தம்

இந்தியாவின் முன்னணி இருசக்கர வாகன தயாரிப்பு நிறுவனமான ஹீரோ மோட்டோகார்ப், ஜப்பானின் 'ஹோண்டா மோட்டார்சைக்கிள் & ஸ்கூட்டர் இந்தியா' நிறுவனத்துடன் இணைந்து 'இம்பல்ஸ்' என்ற பைக்கை 2011ஆம் ஆண்டில் அறிமுகப்படுத்தியது. இது அட்வெஞ்சர் பைக்காகவும் பயன்படுத்தத்தக்க வகையில் உள்ள இந்தியாவின் ஒரே டூயல் பர்பஸ் மோட்டார்சைக்கிளாகும்.



வரும் ஏப்ரல் மாதம் முதல் பாரத் ஸ்டேஜ்-4 மாசு உமிழ்வு சான்று இஞ்சின்களுடன் புதிய பைக்குகள் தயாரிப்பது கட்டாயமாக்கப்பட்டுள்ள சூழலில் திடீரென இம்பல்ஸ் பைக் மாடலை இந்திய சந்தையிலிருந்து நீக்கியுள்ளது ஹீரோ நிறுவனம்.இதுகுறித்து அதிகாரப்பூர்வ அறிவிப்பு வெளியாகாத சூழ்நிலையில் ஹீரோ மோட்டோகார்ப் நிறுவனத்தின் இணையதளத்திலிருந்து இம்பல்ஸ் பைக் மாடல் நீக்கப்பட்டுள்ளது.

முதன்முறையாக 2010 ஆம் ஆண்டு லண்டனில் நடைபெற்ற வாகன கண்காட்சியில் இம்பல்ஸ் பைக் அறிமுகம் செய்யப்பட்டது. பின்னர் 2011 ஆம் ஆண்டு இந்தியாவில் அறிமுகமானது. 150 சிசி இஞ்சின் கொண்ட இம்பல்ஸ் பைக்கிற்கு சமீபகாலமாக வரவேற்பு குறைந்து காணப்படுவதால் ஹீரோ நிறுவனம் இந்த முடிவிற்கு வந்துள்ளதாக தெரிகிறது.இருநிறுவனங்கள் கூட்டு சேர்ந்து தயாரித்த இம்பல்ஸ் மாடலில், நிறுவனங்களுக்கிடையிலான ஒப்பந்தத்தின்படி ஹீரோ நிறுவனம் தன்னிச்சையாக எந்த ஒரு மேம்படுத்துதல் பணியையும் மேற்கொள்ளமுடியாது என்பது குறிப்பிடத்தக்கது.


நீக்கப்படும் இம்பல்ஸ் பைக்கில், 149.2 cc சிங்கிள் சிலிண்டர் என்ஜின் உள்ளது. இது அதிகபட்சமாக 13.2 பிஹச்பி ஆற்றலுடன் 13.4 என்எம் டார்க்கையும் வெளிப்படுத்துகின்றது. இதில் 5 ஸ்பீடு கியர்பாக்ஸ் இடம்பெற்றுள்ளது. இந்த பைக்கின் முன்புறத்தில் டிஸ்க் பிரேக் மற்றும் டிரம் பிரேக் ஆப்ஷனை பெற்றதாக உள்ளது. ஹீரோ இம்பல்ஸ் பைக் பிரேசிலில் விற்பனையில் இருக்கும் ஹோண்டா என்எக்ஸ்ஆர் ப்ரோஸ் பைக்கின் டிசைனில் உருவாக்கப்பட்டதாகும். முன்னதாக, இந்த பைக்கில் உள்ள150சிசி இஞ்சின் அட்வெஞ்சர் ரைடுகளுக்கு திருப்திகரமானதாக இல்லை என்ற ஒரு கருத்து முன்வைக்கப்பட்டுள்ளது.



இதனால் சிலர் இந்த பைக்கின் 150சிசி இஞ்சினை மாற்றிவிட்டு கரிஸ்மா பைக்கின் 223சிசி இஞ்சினை பொருத்தி கஸ்டமைஸ் செய்து ஓட்டிவந்தனர். இந்த பைக்கின் இஞ்சின் ஆற்றலை அதிகரிக்க ஹீரோ நிறுவனம் மறுத்து வந்தது குறிப்பிடத்தக்கது.245மிமீ கிரவுண்ட் கிளியரன்ஸ் உடன் ஆஃப்ரோடு பயணங்களுக்கு ஏற்ற வகையில் அமைந்திருக்கும் இம்பல்ஸ் மாடலில் புதிதாக கூடுதல் சிசி கொண்ட வேரியன்டை பெற்ற மாடலாக வரலாம் என எதிர்பார்க்கப்பட்ட நிலையில் அந்தமாதிரியான எந்தவொரு திட்டத்தையும் ஹீரோ செயல்படுத்தும் திட்டமில்லை என்றே தற்போது உறுதிப்படுத்தியுள்ளது.

பட்டய கிளப்ப வரும் ராயல் என்ஃபீல்டு 750சிசி பைக்

ராயல் என்ஃபீல்டு நிறுவனம் 750 சிசி திறனில் மோட்டார் சைக்கிளை தயாரித்து உள்ளது. இது பழையை செய்தி, ஆனால் இதில் புதியது என்னவென்றால் அதற்கான சோதனை ஓட்டம் இந்தியாவில் நடைபெற்று வருகிறது.நடுத்தர எடை மோட்டார் சைக்கிளை பொறுத்தவரை இந்தியாவில் ராயல் என்ஃபீல்டுதான் முதலிடத்தில் உள்ளது. இந்தியாவின் பல்வேறு மாநிலங்களிலும் என்றுமே ராயல் என்ஃபீல்டு தயாரிப்புகளுக்கு ஒரு பெரிய வியாபார வட்டம் உள்ளது.



350சிசி முதல் 500சிசி வரையிலான நடுத்தர எடை மோட்டார் சைக்கிள்களை வெளியிட்ட வந்த ராயல் என்ஃபீல்டுநிறுவனம், 750சிசி திறனில் இயங்கும் மோட்டார் சைக்கிளை தயாரிக்கவுள்ளதாக அறிவித்து, அதற்கான முதற்கட்ட வேலைகளில் இறங்கியது.



ராயல் என்ஃபீல்டு 750சிசி மோட்டார் சைக்கிளின் தயாரிப்பு பணிகள் முடிக்கப்பட்டு, அதற்கான சோதனை ஓட்டம் ஸ்பெயின் நாட்டில் முதலாவதாக நடைபெற்றது. அதற்கான புகைப்படங்கள் வெளிவந்திருந்த நிலையில், தற்போது இந்தியாவில் சென்னையில் RE 750சிசி மோட்டார் சைக்கிளின் சோதனை ஓட்டம் நடைபெற்றுள்ளது. சோதனை ஓட்டம் நடைபெற்றதற்கான புகைப்படங்கள் வெளியாகி, வண்டியின் தோற்றத்தை குறித்த விவாதமும் ஆட்டோமொபைல் வட்டாரத்தில் பரவலாக பேசப்பட்டு வருகிறது.சோதனை ஓட்டத்தை பொறுத்தவரை 750சிசியின் வெளிப்புற அமைப்பு காண்டினென்டல் ஜி.டி. மோட்டார் சைக்கிள் போலதான் இருக்கும் என்பது தெரியவந்துள்ளது. ஆனால் அதனுடைய எஞ்சின் திறனில் தான் குறிப்பிடும்படியான மாற்றங்கள் உள்ளன.

ட்வின் சிலிண்டர் அமைப்பில் தயாரிக்கப்பட்டுள்ள RE 750சிசி மோட்டார் சைக்கிள் பார்பதற்கு காண்டினென்டல் ஜி.டி வாகனத்தை நினைவுக்கு கொண்டு வருகிறது. 750சிசியில் இயங்கும் ராயல் என்ஃபீல்ட்டின் புதிய மோட்டார் சைக்கிள், 50 பி.எச்.பி பவர் மற்றும் 60 என்.எம் டார்க் திறனை வழங்கும்.350சிசி, 500சிசி திறன்பெற்ற ராயல் என்ஃபீல்ட்டின் மோட்டார் சைக்கிள்கள் ரூ.1.5 லட்சம் முதல் ரூ.2 லட்சம் வரை இந்தியாவில் விற்பனையில் உள்ளன. இந்தாண்டின் இறுதியில் வெளிவரவுள்ள புதிய 750சிசி மோட்டார் சைக்கிள் விலையை குறித்து ராயல் என்ஃபீல்டு நிறுவனம் விரைவில் அறிவிக்கும் என எதிர்பார்க்கப்படுகிறது.

ஏப்ரல் 12 ஆம் தேதி இந்தியாவுக்கு வரும் புதிய ஜீப் காம்பஸ்

ஜீப் நிறுவனம் நீண்ட நாட்களாக எதிர்பார்க்கப்பட்ட மேம்படுத்தப்பட்ட புத்தம் புதிய காம்பஸ் மாடல் ஏப்ரல் 12 ஆம் தேதி இந்தியாவில் வெளியிடப்படும் என அதிகாரப்பூர்வமாக அறிவித்துள்ளது. இந்த மாடல் முதலில் கடந்த ஆண்டு பிரேசிலில் வெளியிடப்பட்டது. இந்த மாடல் இந்தியாவிலேயே அசெம்பிள் செய்யப்படுவது குறிப்பிடத்தக்கது. மேலும் இது தான் இந்தியாவில் அசெம்பிள் செய்யப்படும் முதல் ஜீப் மாடல் என்பதும் குறிப்பிடத்தக்கது.



தோற்றத்தில் இந்த மாடல் பார்ப்பதற்கு சிறிய கிராண்ட் செரோக்கீ போல இருக்கிறது. கிராண்ட் செரோக்கீ மற்றும் ரெனெகெட் மாடலின் வடிவங்கள் அதிகமாக இதில் பயன்படுத்தப்பட்டுள்ளது. உட்புறத்திலும் கிராண்ட் செரோக்கீ மாடலின் வடிவங்களே அதிகம் பயன்படுத்தப்பட்டுள்ளது. இருந்தாலும் இந்த மாடல் சிறப்பான SUV  போன்ற தோற்றத்தை தருகிறது.



நிறைய விதமான எஞ்சின் ஆப்ஷன்களில் நாடுகளுக்கு ஏற்றவாறு இந்த மாடல் கிடைக்கும். இந்தியாவில் இந்த மாடல் 1.4 லிட்டர் பெட்ரோல் மற்றும் 2.0 லிட்டர் டீசல் எஞ்சினுடன் வெளியிடப்படலாம். மேலும் இந்த மாடல் ஆறு ஸ்பீட் மேனுவல் மற்றும் ஒன்பது ஸ்பீட் ஆட்டோமேட்டிக் கியர் பாக்சில் கிடைக்கும் எனவும் எதிர்பார்க்கப்படுகிறது. இந்த மாடல் தோராயமாக ரூ.25 லட்சம் விலை கொண்டதாக வெளியிடப்படும் என எதிர்பார்க்கப்படுகிறது.

ரூ. 8.41 லட்சம் ஆரம்ப விலையில் வெளியிடப்பட்டது ஃபோர்ஸ் குர்கா

ஃபோர்ஸ் நிறுவனம் மேம்படுத்தப்பட்ட குர்கா மாடலை ரூ. 8.41 லட்சம் -  கோவை ஷோரூம் ஆரம்ப விலையில் வெளியிட்டுள்ளது. இந்த மாடலின் என்ஜின் மற்றும் ஒப்பனையில் சில மாற்றங்கள் செய்யப்பட்டுள்ளது. இந்த மாடல் ஐந்து கதவுகள் கொண்ட எக்ஸ்பெடிஷன் மற்றும் மூன்று கதவுகள் கொண்ட எக்ஸ்ப்ளோர் எடிசன் என இரண்டு வேரியண்டில் கிடைக்கும்.  எக்ஸ்பெடிஷன் மாடல் ரூ. 8.41 லட்சம் விலையிலும் எக்ஸ்ப்ளோர் எடிசன் மாடல்  ரூ. 9.36 லட்சம் விலையிலும் வெளியிடப்பட்டுள்ளது.



இந்த மாடலில் புதிய முன்புற மற்றும் பின்புற பம்பர்கள், புதிய சஸ்பென்ஷன் மற்றும் புதிய ஸ்டேரிங் வீல் ஆகியவை கொடுக்கப்பட்டுள்ளது. இதன் எக்ஸ்பெடிஷன் மாடல் இரண்டு வீல் ட்ரைவிலும் எக்ஸ்ப்ளோர் எடிசன் மாடல் நான்கு வீல் ட்ரைவிலும் கிடைக்கும். இதன் இரண்டு மாடலும் திறந்த மற்றும் மூடிய மேற்கூரையுடன் கிடைக்கும். இதன் மூடிய மேற்கூரை கொண்ட மாடலில் குளிரூட்டி கிடைக்கும்.



இந்த மாடலில் நான்கு சிலிண்டர் கொண்ட 2.6 லிட்டர் டர்போ சார்ஜ் டீசல் என்ஜின் பொருத்தப்பட்டுள்ளது. இது 85Bhp திறனையும் 230Nm  இழுவைத்திறனையும் வழங்கும். மேலும் இந்த என்ஜின் BSIV மாசுக்கட்டுப்பாட்டில் கிடைக்கும். இந்த மாடலில் 5 ஸ்பீட் கொண்ட மேனுவல் கியர் பாக்ஸ் பொருத்தப்பட்டுள்ளது. 

ஹோண்டா கார்கள் விலை நடப்பாண்டில் 2வது முறையாக உயர்கிறது

கார் உற்பத்தியில் முன்னணியில் திகழும் ஜப்பானின் ஹோண்டா மோட்டார்ஸ் நிறுவனம் 1995 ஆம் ஆண்டு முதல் இந்தியாவில் கார் உற்பத்தியில் ஈடுபட்டுள்ளது. இந்த நிறுவனத்தின் ஹோண்டா சிட்டி கார், இந்திய கார் வரலாற்றில் குறிப்பிடத்தக்க ஒரு மாடலாக வெற்றி பெற்றுவிட்டது.



கடந்த ஜனவரி மாதத்தில் தனது கார்களின் விலையை 3% உயர்த்திய ஹோண்டா நிறுவனம் தற்போது இந்த ஆண்டிலேயே இரண்டாவது முறையாக மீண்டும் அனைத்து கார் மாடல்களின் விலையையும் உயர்த்தியுள்ளது. இந்த விலை ஏற்றம் வரும் ஏப்ரல் மாதம் முதல் அமலுக்கு வருகிறது.

சில தினங்களுக்கு முன்னர் ஹோண்டா நிறுவனம் புதிதாக டபிள்யூஆர்-வி எனும் கிராஸ்ஓவர் மாடல் கார் ஒன்றினை அறிமுகப்படுத்தியது. புதிய விலை ஏற்றத்தில் இருந்து இந்த கார் மட்டும் விலக்கு பெற்றுள்ளது.விலை ஏற்றம் குறித்து ஹோண்டா கார்ஸ் இந்தியா நிறுவனத்தின் விற்பனை மற்றும் சந்தைப்படுத்துதல் பிரிவு துணைத் தலைவர் ஞானேஸ்வர் சென் கூறுகையில், "போக்குவரத்து மற்றும் மூலப் பொருள் விலை ஏற்றத்தின் காரணமாக கார்களின் விலையை உயர்த்தும் முடிவை எடுக்க நேர்ந்தது, இந்த விலை ஏற்றம் ஏப்ரல் முதல் வாரத்திலிருந்து அமலாகும்" என்றார்.



இந்த புதிய விலை ஏற்றத்தின்படி ஹோண்டா நிறுவனத்தின் டபிள்யூஆர்-வி மாடலை தவிர்த்து ஹோண்டா சிட்டி, பிரியோ, அமேஸ், ஜாஸ், பிஆர்-வி, சிஆர்-வி மற்றும் ஹைபிரிட் காரான அகார்டு கார்களின் விலை வரும் ஏப்ரல் மாதம் முதல் 10,000 ரூபாய் அதிகரிக்க உள்ளது. (ஹோண்டா கார்கள் 4.69 லட்ச ரூபாய் முதல் 37 லட்ச ரூபாய் வரையிலான விலை கொண்டது.)இதே போல கடந்த ஜனவரி மாதம் உற்பத்தி செலவினம் அதிகரிப்பு மற்றும் டாலருக்கு நிகரான இந்திய ரூபாயின் மதிப்பில் நீடித்து வந்த ஏற்ற இறக்கங்கள் காரணமாக கார்களின் விலையை ஹோண்டா நிறுவனம் 3% உயர்த்தியது குறிப்பிடத்தக்கது.



ஹோண்டா நிறுவனம் மட்டுமல்லாது ஹூண்டாய், மஹிந்திரா, நிஸான், ரெனோ, டாடா மோட்டார்ஸ், டொயோட்டா, ஃபோக்ஸ்வேகன், மெட்சிடஸ் பென்ஸ் நிறுவனங்களும் தங்களது கார்களின் விலையை ஜனவரி மாதவாக்கில் உயர்த்தியது நினைவிருக்கலாம்.இதே போல சமீபத்தில் ஜெர்மனியை சேர்ந்த சொகுசு கார்களை தயாரிக்கும் பிஎம்டபிள்யூ நிறுவனமும் அதன் கார்களின் விலையை வரும் ஏப்ரல் 1ம் தேதி முதலாக 2% உயர்த்துவதாக அறிவித்தது.

புதிய டாடா டீகோர் டெஸ்ட் டிரைவ் ரிப்போர்ட்!

டாடா கார்கள் என்றால் முகம் சுளித்த காலம்போய் இப்போது ஆவலைத் தூண்டும் அளவுக்கு மேம்பட்டு நிற்கின்றன. கடந்த ஆண்டு அறிமுகம் செய்யப்பட்ட டாடா டியாகோ காருக்கு கிடைத்திருக்கும் நல்ல வரவேற்பு சாட்சியாக இருக்கிறது. இந்த நிலையில், கடும் சந்தைப் போட்டி மிகுந்த 4 மீட்டர் நீளத்துக்கும் குறைவான காம்பேக்ட் செடான் கார் என்ற ரகத்துக்கு பிள்ளையார் சுழி போட்ட டாடா மோட்டார்ஸ் நிறுவனம், இந்த செக்மென்ட்டில் டீகோர் என்ற புதிய கார் மாடலை விரைவில் களமிறக்குகிறது.

ஏராளமான கார் மாடல்கள் போட்டி போடும் இந்த செக்மென்ட்டில் சற்று வித்தியாசத்தை காட்டினால்தான் வெற்றி பெற முடியும் என்பதை உணர்ந்து கொண்டு சற்று புதிய வடிவமைப்பு தாத்பரியங்களுடன் புதிய டீகோர் கார் மாடல் வருகிறது.

டிசைன் 


கடந்த ஆண்டு விற்பனைக்கு அறிமுகம் செய்யப்பட்டு நல்ல வரவேற்பை பெற்றிருக்கும் டாடா டியாகோ காரில் பூட்ரூம் சேர்க்கப்பட்ட செடான் ரக மாடல்தான் டீகோர். எனவே, முன்புற வடிவமைப்பு டியாகோ காரை ஒத்திருக்கிறது. தேன்கூடு வடிவ க்ரில் அமைப்பின் நடுவில் டாடா லோகோ கம்பீரமாக வீற்றிருக்கிறது. புரொஜெக்டர் ஹெட்லைட்டுகள், க்ரோம் வளையத்திற்குள் பனி விளக்குகள் இருப்பதும் கவர்ச்சிதான். டியாகோ கார் போன்றே முகப்பு கவர்கிறது.

பக்கவாட்டு டிசைன் 


மார்க்கெட்டில் உள்ள அனைத்து காம்பேக்ட் செடான் கார்களுமே ஹேட்ச்பேக் மாடலின் அடிப்படையிலான செடான் வெர்ஷன்தான். விற்பனையில் முன்னணியில் உள்ள காம்பேக்ட் செடான் கார்களின் பக்கவாட்டு தோற்றமும், பின்புற தோற்றமும் கவரும் வகையில் இருக்காது. பூட்ரூம் கத்தரித்தது போன்றே காட்சி தரும். ஆனால், புதிய டாடா டீகோர் கார் மாடலில் பூட்ரூம் மிகச்சிறப்பாக சேர்க்கப்பட்டு இருக்கிறது. அத்துடன், இதன் ரூஃப்லைன் எனப்படும் கூரை அமைப்பு மிகவும் வித்தியாசமாக கூபே கார் போன்று வடிவமைக்கப்பட்டு இருப்பது சிறப்பு.

கவர்ச்சியான அலாய் வீல்கள்

இந்த காரின் பெட்ரோல் மாடலில் 15 இன்ச் அலாய் வீல்கள்[டீசல் மாடலில் 14 இன்ச் அலாய் வீல்கள் மட்டுமே]] பொருத்தப்பட்டு இருப்பதும் காருக்கு பொருத்தமாக இருக்கிறது. இதனால்தான், இந்த காரை 'ஸ்டைல்பேக்' என்று குறிப்பிடுகிறது டாடா மோட்டார்ஸ்.

பின்புற டிசைன் 



பெரும்பாலான காம்பேக்ட் செடான் கார்களின் பின்புற டிசைன் கவரும் வகையில் இல்லை என்பது நிதர்சனம். ஆனால், புதிய டாடா டீகோர் காரின் பின்புற டிசைன் மிகச்சிறப்பாகவே இருக்கிறது. எல்இடி டெயில் லைட், வலிமையான பம்பர், பூட்ரூமிலிருந்து சீராக மேலே எழும் கூரை அமைப்பு என கவர்ச்சியாகவே இருக்கிறது. பின்புறத்தில் ரூஃப் ஸ்பாய்லரும் காரின் கவர்ச்சிக்கு கூடுதல் வலு சேர்க்கும் அம்சம். 

பூட்ரூம் 



புதிய டாடா டீகோர் காரின் அடுத்து ஒரு முக்கிய விஷயம் பொருட்கள் வைத்துக் கொள்வதற்கான பூட் ரூம் இடவசதி. ஆம். இந்த செக்மென்ட் கார்களிலேயே இப்போது அதிக இடவசதி கொண்ட கார் மாடல் புதிய டாடா டீகோர் கார்தான். இந்த காரில் 419 லிட்டர் கொள்திறன் கொண்ட பூட் ரூம் இருக்கிறது. இந்த காரின் சஸ்பென்ஷனில் கொடுக்கப்பட்டு இருக்கும் புதிய டேம்பர் மற்றும் இதர உதிரிபாகங்கள் மூலமாக அதிக பூட்ரூம் இடவசதி சாத்தியப்பட்டிருக்கிறது. மேலும், இந்த பூட்ரூமில் பொருட்களை வைத்து எடுப்பதும் சுலபமாகவே இருக்கிறது.

இன்டீரியர்


டாடா டியாகோ காரின் இன்டீரியர் அமைப்புதான் இந்த காரிலும் பயன்படுத்தப்பட்டு இருக்கிறது. இன்டீரியர் மிக நேர்த்தியாக டிசைன் செய்யப்பட்டிருப்பதோடு, பழைய டாடா கார்களுடன் ஒப்பிடும்போது, உட்புறத்தில் பயன்படுத்தப்பட்டு இருக்கும் பாகங்களின் தரம் மேம்பட்டு இருக்கிறது. தண்ணீர் பாட்டில்கள் மற்றும் ஆவணங்களை வைப்பதற்கு 24 ஸ்டோரேஜ் பகுதிகள் உள்ளன. இந்த காரின் இருக்கைகள், அப்ஹோல்ஸ்ட்ரி ஆகியவை மதிப்பை கூட்டும் விஷயங்களாக கூற முடியும். இரட்டை வண்ண டேஷ்போர்டின் இருமருங்கிலும் கொடுக்கப்பட்டு இருக்கும் ஏசி வென்ட்டுகளை சுற்றிலும் பிரத்யேக வண்ணம் மூலம் அலங்கரிக்கப்பட்டுள்ளது.

புதிய டாடா டீகோர் காரில் 8 ஸ்பீக்கர்கள் கொண்ட சிறந்த ஆடியோ சிஸ்டம் கொடுக்கப்பட்டு இருக்கிறது. இந்த காரில் 5 அங்குல திரையுடன் கூடிய இன்ஃபோடெயின்மென்ட் சிஸ்டம் இருக்கிறது. இந்த இன்ஃபோடெயின்மென்ட் சிஸ்டமானது, வீடியோ ப்ளேபேக், வாய்மொழி உத்தரவுகளுக்கு ஏற்ப செயல்படும் வசதிகளை கொண்டுள்ளது.



மொபைல்போனில் வரும் குறுஞ்செய்திகளை படித்து, வாய்மொழியாக சொல்லும் வசதியும் உண்டு. இன்ஃபோடெயின்மென்ட் சிஸ்டத்தில் உள்ள திரை மூலமாக ரிவர்ஸ் கேமராவை இணைக்க முடிகிறது. டர்ன் பை டர்ன் நேவிகேஷன் வசதி, நவி மற்றும் ஜூக் மொபைல்போன் அப்ளிகேஷன் மூலமாக பாடல்களை கேட்கும் வாய்ப்பும் இருக்கிறது.இதன் இன்ஸ்ட்ரூமென்ட் க்ளஸ்ட்டரில் உள்ள எழுத்துக்கள் எண்களை எளிதாக பார்க்க முடிகிறது. உயர்வகை மாடலில் க்ளைமேட் கன்ட்ரோல் ஏசி இருப்பதும் இந்த காரின் மதிப்பை உயர்த்தும் விஷயம்.



டாடா கார்கள் என்றாலே இடவசதி சிறப்பாக இருக்கும். டியாகோ காரில் அதனை முழுமையாக பெற முடியாவிட்டாலும், அதனை விட வீல்பேஸ் நீளம் 50 மிமீ கூடுதல் என்பதால், டாடா டீகோர் காரின் இடவசதி சிறப்பாகவே இருக்கிறது. நீண்ட தூரம் அமர்ந்து பயணித்தாலும், இருக்கைகள் சொகுசான அனுபவத்தை தரும்.இதன் கூரை அமைப்பு கூபே போன்று இருந்ததால், பின்புற இருக்கையில் உயரமானவர்கள் அமர்ந்தால் தலை இடிக்கும் என்ற சந்தேகம் இருந்தது. ஆனால், நிச்சயமாக வளத்தியானவர்கள் கூட அமர்ந்து செல்வதற்கு எந்த சிரமமும் தெரிய வில்லை. பின் இருக்கை ஹெட்ரெஸ்ட்டை அட்ஜெஸ்ட் செய்ய முடியாது.

பெட்ரோல் மாடல் 

டாடா டியாகோ காரில் பயன்படுத்தப்பட்டு இருக்கும் அதே பெட்ரோல், டீசல் எஞ்சின்கள்தான் இந்த காரிலும் பயன்படுத்தப்பட்டு இருக்கிறது. இரண்டு மாடல்களிலுமே எஞ்சின் இயக்கத்தை ஈக்கோ மற்றும் சிட்டி என்று இருவிதமான நிலைகளில் மாற்றிக் கொள்ளும் வசதி உள்ளது. இந்த காரில் இருக்கும் 3 சிலிண்டர்கள் கொண்ட 1.2 லிட்டர் பெட்ரோல் எஞ்சின் அதிகபட்சமாக 84 பிஎச்பி பவரையும், 114 என்எம் டார்க் திறனையும் வழங்கும். 5 ஸ்பீடு கியர்பாக்ஸ் உள்ளது. இந்த பெட்ரோல் எஞ்சின் நகர்ப்புற சாலைகளிலும், நெடுஞ்சாலைகளிலும் ஓட்டுவதற்கு மிகச்சிறப்பாக இருக்கிறது. நெடுஞ்சாலைகளில் ஓட்டும்போது மிகச் சிறப்பான செயல்திறனை வெளிப்படுத்தி உற்சாகமூட்டுகிறது.




டீசல் மாடல்

 

இந்த காரில் இருக்கும் 1.05 லிட்டர் டீசல் எஞ்சின் அதிகபட்சமாக 69 பிஎச்பி பவரையும், 140 என்எம் டார்க் திறனையும் வெளிப்படுத்தும் திறன் கொண்டது இந்த மாடலிலும் 5 ஸ்பீடு மேனுவல் கியர்பாக்ஸ்தான் இடம்பெற்று இருக்கிறது. டீசல் எஞ்சின் அதிர்வுகள் குறைவாக இருந்தாலும், 1,800 ஆர்பிஎம் முதல் 3,000 ஆர்பிஎம் வரையில் செயல்திறன் மிதமாகவே இருக்கிறது. இது நம் உற்சாகத்தை குறைக்கிறது. மேலும், நெடுஞ்சாலைகளில் ஓவர்டேக் செய்யும்போது கியரை குறைத்தே ஆக வேண்டும்.

டாடா டியாகோ காரின் மைலேஜ் விபரங்களின் அடிப்படையில் பார்க்கப்போனால் பெட்ரோல் மாடல் லிட்டருக்கு 20 கிமீ மைலேஜையும், டீசல் மாடல் லிட்டருக்கு 25 கிமீ மைலேஜையும் தரும் வகையில் இருக்கும் என எதிர்பார்க்கப்படுகிறது. எனவே, சிறந்த மைலேஜ் தரும் மாடல்களில் ஒன்றாக இருக்கும்.முன் இருக்கையில் அமர்ந்து சாலையை பார்க்கும்போது சிறப்பான பார்வை திறனை வழங்குகிறது. இதன் அட்ஜெஸ்ட்டபிள் ஸ்டீயரிங் வீல் அமைப்பும் சாலையை எளிதாக பார்த்து ஓட்டுவதற்கும், பிடிமானத்திற்கும் நன்றாகவே இருக்கிறது. ஸ்டீயரிங் வீலில் ஆடியோ கன்ட்ரோல் சுவிட்சுகள் கொடுக்கப்பட்டு இருக்கின்றன.

ஓட்டுதல் தரம்

ஓட்டுதல் தரமும் சிறப்பாகவே இருந்ததாக எமது குழுவினர் தெரிவித்தனர். மோசமான சாலைகளை கூட இந்த கார் மிகச் சிறப்பாக கையாள்வதாகவும், பாடி ரோல் மிக குறைவாக இருப்பதை உணர முடிந்ததாகவும் தெரிவித்தனர். இதன் சஸ்பென்ஷனும் அனைத்து சாலை நிலைகளையும் செம்மையாகவே எதிர்கொள்கிறது.

பாதுகாப்பு வசதிகள் 



புதிய டாடா டீகோர் காரில் முன்புறத்தில் இரண்டு உயிர்காக்கும் காற்றுப்பைகள் நிரந்தர பாதுகாப்பு அம்சமாக கொடுக்கப்பட்டு இருக்கின்றன. அனைத்து சக்கரங்களுக்கும் பிரேக் பவரை சரியான விகிதத்தில் செலுத்தும் இபிடி நுட்பத்துடன் கூடிய ஏபிஎஸ் பிரேக்கிங் சிஸ்டம் உள்ளது. வளைவுகளில் கார் மிகுந்த நிலைத்தன்மையுடன் செல்வதற்கான கார்னரிங் ஸ்டெபிளிட்டி கன்ட்ரோல் சிஸ்டம், விபத்துக்களின்போது மோதல் தாக்கத்தை உள்வாங்கிக் கொண்டு பயணிகளுக்கு பாதிப்பை குறைப்பதற்கான விசேஷ கட்டமைப்பு போன்றவை இந்த காரை மிகச் சிறந்த பாதுகாப்பு வசதிகள் கொண்ட மாடலாக மாற்றுகிறது.

எமர்ஜென்சி அசிஸ்ட்

ஃபோர்டு கார்களில் இருப்பதுபோன்றே, இந்த காரில் மிக முக்கிய வசதி ஒன்று உள்ளது. விபத்துக்கள் நேரும்போது, நெருங்கி உறவினர்கள் மற்றும் நண்பர்களுக்கு கார் இருக்கும் இடம் பற்றி துல்லியமாக தகவல் தரும் டாடா எமர்ஜென்சி அசிஸ்ட் ஆப் என்ற விசேஷ வசதியும் உள்ளது.

மதிப்பு வாய்ந்த கார் 

வரும் 29ந் தேதி புதிய டாடா டீகோர் கார் விற்பனைக்கு வர இருக்கிறது. விலை வெளியிடப்படாத நிலையிலும், இந்த காருக்கு நல்ல வரவேற்பு இருக்கும் என்று நம்பலாம். பொதுவாக வாடிக்கையாளர் விரும்பும் சிறப்பான டிசைன், இடவசதி, வசதிகள், அதிக மைலேஜ், பாதுகாப்பு வசதி என எல்லாவிதத்திலும் கில்லியாக இருக்கிறது புதிய டாடா டீகோர்.

புதிய டாடா டீகோர் கார் அனைத்து விதத்திலும் கொடுக்கும் பணத்திற்கு சிறப்பான தேர்வாக இருக்கும். விலை மட்டும் எதிர்பார்ப்பை பொய்க்காமல் நிர்ணயித்துவிட்டால், நிச்சயம் வாடிக்கையாளர்களின் தேர்வில் முக்கிய இடத்தை பெறும்.இந்த காரை மாருதி டிசையர் கார் அளவுக்கு விற்பனையில் போட்டியாக இல்லாவிட்டாலும், டாடா டியாகோ கார் போன்றே, தனக்கென தனி வாடிக்கையாளர் வட்டத்தை இந்த கார் ஏற்படுத்திக் கொள்ளும் என்று உறுதியாக நம்பலாம். டாடா மோட்டார்ஸ் விற்பனையில் டாடா டியாகோ காரை போன்று இந்த புதிய டாடா டீகோர் காரும் சிறப்பான பங்களிப்பை தரும் என்று எதிர்பார்க்கப்படுகிறது.

பி.எம்.டபுள்யூ-வின் அதிநவீன தானியங்கி கார்: விரைவில் அறிமுகம்

பெர்லின்:

உலகில் தானியங்கி கார்களை தயாரிக்கும் நிறுவனங்களின் எண்ணிக்கை அதிகரித்து கொண்டே வருகிறது. பல்வேறு கார் தயாரிப்பு நிறுவனங்களும் புதிய ஒப்பந்தங்களின் மூலம் இணைந்து தானியங்கி கார்களை உருவாக்க பணியாற்றி வருகின்றன. அந்த வகையில் பி.எம்.டபுள்யூ. நிறுவனமும் தானியங்கி கார்களை தயாரிக்க இருப்பதாக தகவல்கள் வெளியாகியுள்ளது. 

மற்ற நிறுவனங்களை போன்று இல்லாமல் பி.எம்.டபுள்யூ. நிறுவனத்தின் தானியங்கி கார் லெவல் 5 தானியங்கி முறைகளை கொண்டிருக்கும் என கூறப்படுகிறது. மனிதர்களை போன்று எவ்வித சூழ்நிலையிலும் சாதூர்யமாக முடிவுகளை எடுத்து தானாகவே இயங்கும் படி லெவல் 5 தானியங்கி முறை இருக்கும். 

லெவல் 5 தானியங்கி முறைகள், சிறிதளவும் ஓட்டுநரின் ஒத்துழைப்பு இன்றி சாலைகளில் சாதூர்யமாக செல்லும். இந்நிலையில் தற்சமயம் சோதனை செய்யப்பட்டு வரும் தானியங்கி கார்களில் லெவல் 2 அல்லது லெவல் 3 என்ற தானியங்கி முறைகள் மட்டுமே வழங்கப்படுகிறது. 

லெவல் 2 மற்றும் லெவல் 3 தானியங்கி முறைகளில் ஓட்டுநரின் கவனம் நிச்சயம் தேவை என்பதால் அனைத்து வித சாலைகளிலும் தானியங்கி முறையில் செல்லாது என்பதும் குறிப்பிடத்தக்கது.  

புதிய தானியங்கி கார்களை தயாரிக்க பி.எம்.டபுள்யூ நிறுவனம் மற்றும் இஸ்ரேலை சேர்ந்த தானியங்கி தொழில்நுட்பங்களை உருவாக்கும் மொபைல்ஐ நிறுவனங்களுடன் சமீபத்தில் ஒப்பந்தம் கையெழுத்தானது.

புதிய டாடா டிகோர் காரின் அறிமுக தேதி அறிவிப்பு!

ஜெனிவா மோட்டார் கண்காட்சியில் காட்சிப்படுத்தப்பட்டுள்ள டாடா டிகோர் வரும் மார்ச் 29ம் தேதி இந்தியாவுக்கு விற்பனைக்கு வரும் என டாடா மோட்டார்ஸ் அறிவித்துள்ளது. தயாரிப்பு நிலை மாடல் வெளியானபோதே பரபரப்பை ஏற்படுத்திய டாடா டிகோர், விற்பனைக்கு வந்தால் நிச்சயம் சாதனை படைக்கும் என்றே கணக்கிடப்பட்டு வருகிறது.

ஜெனிவாவில் எடிசன் என்ற பெயரில் காட்சிப்படுத்தப்பட்டு இருக்கும் இந்த காரின் முன்புறத்தில் டாடா டியாகோவிலிருந்த முகப்பு க்ரில் அமைப்பு, நடுவில் டாடா மோட்டார்ஸ் லோகோ இடம்பெற்றிருக்கிறது. புரொஜெக்டர் ஹெட்லைட்டுகள் கொடுக்கப்பட்டு இருக்கின்றன.

டாடா மோட்டார்ஸ் தயாரித்திருந்த ஹேட்ச்பேக் காரான டியாகோவின் சில அமைப்புகளை பெற்றுள்ள டிகோர், அடிப்படையிலே உருவாக்கப்பட்ட இம்பேக்ட் டிசைன்களையும் கொண்டுள்ளது. மேலும், செடான் ரக கார்களுக்கு உரித்தான பூட் டிசைன் அமைக்கப்பட்டுள்ளதால் டாடா மோட்டார்ஸ் டிகோர் காரை ஸ்டைல்பேக் என அழைக்கின்றது.

புதிய டாடா டிகோர் காரில் 1.2 லிட்டர் ரெவோட்ரான் எஞ்சின் பொருத்தப்பட்டு இருக்கிறது. பெட்ரோலில் இயங்கும் இந்த எஞ்சின், அதிகபட்சமாக 83 பிஎச்பி பவரையும், 114 என்எம் டார்க் திறனையும் வழங்கும். 5 வேக மெனுவில் கியர்பாக்ஸ் பொருத்தப்பட்டுள்ளது. இந்தியாவில் விற்பனைக்காக டாடா டிகோர் 1.05 லிட்டர் டீசல் எஞ்சினிலும் வர இருக்கிறது.

டாடா டியகோவிலும் இதே எஞ்சின்கள் தான் பொருத்தப்பட்டு இருக்கின்றன. அதனால் செயல்பாடுகளை பொருத்தவரை டாடா டிகோர், டியோகோ போன்று தான் இருக்கும் என்பது பல ஆட்டோமொபைல் வல்லுநர்களின் கருத்து. இன்டீரியரிலும் அதிக வித்தியாசங்கள் இருக்காது.

டாடா டிகோர், டாடா இண்டிகோ காருக்கான மாற்றாக இருக்கும் என்று எதிர்பார்க்கப்படுகிறது. மேலும் 4 மீட்டருக்கும் குறைவாக தயாரிக்கப்பட்டுயிருப்பதால் டிகோருக்கான வரி விதிப்பு குறைவாக இருக்கும். இதனால், மிக சவாலான விலையில் எதிர்பார்க்கப்படுகிறது. இதனாலேயே டிகோரின் விற்பனை அதிகரிக்க வாய்புள்ளது.

1000 வைரக்கற்களை தூளாக்கி பெயிண்டிங் செய்த ரோல்ஸ் ராய்ஸ் கார்!

இங்கிலாந்தை சேர்ந்த ரோல்ஸ் நிறுவனம் ஆடம்பர கார்கள் தயாரிப்பதில் உலகிலேயே முதன்மையானது. பெரும் பணக்காரர்கள் கூட ரோல்ஸ்ராய்ஸ் கார் வாங்குவதை லட்சியமாகவோ, அல்லது கனவாகவோ தான் வைத்திருப்பர். அந்தளவுக்கு ரோல்ஸ்ராய்ஸ் கார்கள் விலை மதிப்புள்ளவை.

ஆடம்பரத்தை பறைசாற்ற இம்முறை ஒருபடி மேலே சென்றுள்ளது ரோல்ராய்ஸ் நிறுவனம். விலை உயர்ந்த ரோல்ராய்ஸ் கோஸ்ட் மாடல் கார் ஒன்றினை வைரக்கற்கள் கொண்டு பெயிண்டிங் செய்துள்ளது.

ஒரு வைர நகை வாங்கவே நம்மில் பலருக்கு ஒரு ஆயுசு போதாது. ஆனால் இங்கு ஒரு காருக்கு பெயிண்டிங் செய்ய 1,000 வைரக்கல்களை உபயோகித்துள்ளனர் என்பது பிரம்மாண்டத்தின் உச்சமாகவே உள்ளது.இதற்கு முன்னதாக, தங்க முலாம் கொண்டு பெயிண்டிங் செய்துள்ள கார்கள் குறித்து கூட கேள்விப்பட்டிருக்கிறோம், ஆனால் வைரக்கற்கள் கொண்டு பெயிண்டிங் செய்து உலகையே திரும்பிப் பார்க்க வைத்துள்ளது ரோல்ராய்ஸ் நிறுவனம்.

முதலில், வைரக்கற்களை அரைத்து பெயிண்டிங் செய்வது சாத்தியம் தானா? என்பது குறித்து ரோல்ராய்ஸ் நிறுவனம் இரண்டு மாதங்கள் ஆய்வு செய்துள்ளது. ஏனெனில் வைரக்கற்கள் மிகவும் கடினத்தன்மை வாய்ந்தவை அதனை வெளிப்புறத்தில் பெயிண்டிங் செய்தால் அதை தொடும் போது கைகளுக்கு பாதிப்பை ஏற்படுத்தலாம்.

ஆய்வில் சாத்தியக்கூறுகள் உள்ளது என்பதனை உணர்ந்த ரோல்ஸ்ராய்ஸ் குழு, இதற்காக சிறந்த 1,000 வைரக்கற்களை தேர்ந்தெடுத்துள்ளது.1,000 வைரக்கற்களையும் மிகவும் நயமாக அரைத்து தூளாக்கியுள்ளனர். இதனை கார் பெயிண்டில் கலந்து மிகவும் பக்குவமான முறையில் பிரத்யேக முறைகள் மூலமாக கோஸ்ட் காருக்கு பெயிண்டிங் செய்துள்ளனர்.

சற்று மங்கிய ஒளியில் சாதாரணமாக இக்கார் காட்சியளித்தாலும், ஒளி படும் போது மிகவும் பளபளப்பாக ஜொலிக்கிறது ரோல்ஸ்ராய்ஸ் கோஸ்ட். இக்காருக்கு ‘எலிகன்ஸ்' என சிறப்பு பெயர் வைத்துள்ளனர். இதனை ஜெனிவா மோட்டார் கண்காட்சியில் காட்சிப்படுத்துகிறது ரோல்ஸ்ராய்ஸ்.

உலகிலேயே மிகவும் ஆடம்பர கார் பெயிண்டிங்காக இது அமைந்துள்ளது. தனது வாடிக்கையாளர் ஒருவருக்காக மிகவும் பிரத்யேகமாக இக்காருக்கு வைர பெயிண்டிங் செய்துள்ளது ரோல்ஸ்ராய்ஸ் நிறுவனம். எனினும், அந்த வாடிக்கையாளர் குறித்த தகவல்களை அந்நிறுவனம் வெளியிடவில்லை.வைரங்களை அரைத்து பெயிண்டிங் செய்தாலும், இதன் பளபளப்பு என்றுமே நிலைத்திருக்கும் என்று ரோல்ஸ்ராய்ஸ் நிறுவனம் தெரிவித்துள்ளது. இதற்காக பிரத்யேக பராமரிப்பு முறை எதுவும் தேவைப்படாது எனவும் கூறினர்.ஒரு தங்க நகையை போட்டுக்கொண்டு சாலையில் சென்றாலே நிம்மதியாக செல்ல முடியாத இன்றைய சூழ்நிலையில், 1,000 வைரக்கற்களால் ஆன இந்த காரை பாதுகாக்க இதன் உரிமையாளர் நிச்சயம் மெனக்கெடத்தான் வேண்டும்.

உலகில் அதிகம் விற்பனையாகும் பைக் என்ற சாதனையை படைத்த ஸ்பிளெண்டர் பைக்!

உலகிலேயே அதிகமாக விற்பனையாகும் இருசக்கர வாகனமாக ஹீரோ ஸ்பிளெண்டர் பைக், ஹோண்டாவின் ஆக்டிவா ஸ்கூட்டரைப் பின்னுக்குத் தள்ளி மீண்டும் முதலிடம் பிடித்துள்ளது. இந்த நிதியாண்டின் 3வது கால்பகுதியில் உலகில் அதிகம் விற்பனையான பைக் என்ற பெருமையை பெற்றுள்ளது ஹீரோ ஸ்பிளெண்டர். நிதி ஆண்டின் முதல் பாதியில் ஆக்டிவா ஸ்கூட்டர்கள் முதலிடம் வகித்து வந்தது.

ஹீரோ நிறுவனத்தின் ஸ்பிளெண்டர் பைக் 3வது காலாண்டில் 5,91,017 என்ற எண்ணிக்கையில் உலகில் முழுவதும் விற்பனையாகியுள்ளன. ஹோண்டா ஆக்டிவா மாடலை பொறுத்தவரையில் 5,69,972 பைக்குகள் உலகம் முழுவதும் விற்பனையாகியுள்ளன.



1994ஆம் ஆண்டில் முதல் முறையாக ஸ்பிளெண்டர் பைக்குகளை அறிமுகப்டுத்தியது ஹீரோ ஹோண்டா நிறுவனம். இது ஹீரோ என்ற இந்திய நிறுவனமும், ஹோண்டா என்ற ஜப்பானிய நிறுவனத்தின் கூட்டு நிறுவனமாகும். ஸ்பிளெண்டர் பைக்குகள் முன்னதாக இந்திய இருசக்கர வாகன சந்தையில் கோலோய்ச்சி வந்த ஹீரோ ஹோண்டா ‘சிடி100' மாடலின் வழித்தோன்றல் ஆகும்.

ஸ்பிளெண்டர் பைக்குகளின் அறிமுகம் இந்திய இருசக்கர வாகன சந்தையில் புதிய புரட்சியை ஏற்படுத்தியது எனலாம். ஸ்பிளெண்டர் பைக்குகள் விற்பனையில் புதிய சாதனை படைத்தது. கிராமம், நகரம் என அனைத்து தரப்பினருக்கு ஏற்ற வகையில் இருந்ததோடு சிறந்த மைலேஜூம் கிடைத்தது இந்த பைக்கின் வெற்றிக்கு அடித்தளமாக அமைந்தது.


ஓட்டுவதற்கு மென்மையாகவும், கட்டுப்படுத்த எளிமையாக இருந்த காரணத்தினாலும் பலருக்கும் இது பிடித்தமான பிராண்டாக விளங்கியது. ஆரம்ப காலத்தில் 100சிசி எஞ்சினுடன் வெளிவந்த ஸ்பிளெண்டர் பைக்குகள் காலப்போக்கில் பல்வேறு மாறுதல்களைக் கண்டது. 2014ஆம் ஆண்டில் மேம்படுத்தப்பட்ட மாடலான ஸ்பிளெண்டர்+ பைக்குகளை அறிமுகப்படுத்தியது ஹீரோ ஹோண்டா.2007 ஆம் ஆண்டில் அலாய் வீல்கள் மற்றும் சில கிராஃபிக்ஸ் மாற்றங்களுடன் மீண்டும் ஸ்பிளெண்டர்+ பைக்குகள் அறிமுகமாயின. 2011ஆம் ஆண்டில் ஸ்பிளெண்டர் ப்ரோ என்ற மாடலும் அறிமுகப்படுத்தப்பட்டது.

இப்படி பல்வேறு மாறுதல்கள் அடைந்த போதிலும் குறிப்பிடத்தக்க மாற்றமாக ‘ஹீரோ ஹோண்டா' என்ற நிறுவனம் 2011ஆம் ஆண்டில் இருவேறு நிறுவனங்களாக பிரிந்தது. அதன் பின்னர் ‘ஹீரோ மோட்டோ கார்ப்' என்ற நிறுவனத்தின் கீழ் ஸ்பிளெண்டர் பைக்குகள் புதிய பரினாம வளர்ச்சி பெற்றன.

014ஆம் ஆண்டில் ஸ்பிளெண்டர் ஐ-ஸ்மார்ட் என்ற புதிய மாடல் எலெக்ட்ரிக் ஸ்டார்ட் தொழில்நுட்பத்தில் அறிமுகப்படுத்தப்பட்டது. நீண்ட நெடிய காலமாக மக்களுடன் பின்னிப்பிணைந்து வளர்ந்து வரும் ஸ்பிளெண்டர் பைக்குகளை தற்போது அடுத்த தலைமுறையினரும் ஓட்டத் தொடங்கியுள்ளனர்.இந்திய சாலைகளில் ஸ்பிளெண்டர் பைக்குகளின் பயணம், 25 ஆண்டுகள் என்ற மாபெரும் வெள்ளி விழா சாதனையை படைக்க காத்திருக்கின்றன. இந்தியாவில் பாரம்பரியமிக்க பைக் பிராண்டாகவும் இவை விளங்குகின்றன என்பது குறிப்பிடத்தக்கது.

காலத்திற்கு தகுந்தவாறு மாறுதல்களை அடைந்து வரும் ஸ்பிளெண்டர் பைக்குகள் தற்போது நவீன டெக்னாலஜி புகுத்தப்பட்டவையாக வெளிவருகிறது. பிளென்டர் ஐ-ஸ்மார்ட் 110 பைக்கினை சமீபத்தில் அறிமுகப்படுத்தியுள்ளது ஹீரோ மோட்டார்ஸ்.